Nú í október fór fram síðari Fulbright heimsókn Bridgetar Burger, Fulbright sérfræðings í STEM menntun. Heimsóknin hófst á þátttöku í Arctic Circle í Reykjavík en lauk á Húsavík með röð vinnustofa fyrir starfsfólk Þekkingarnets Þingeyinga, samfélagstengingum í kringum NorthQuake jarðskjálftaráðstefnuna og samtali við kennara.
Á dagskrá Fulbright heimsóknarinnar voru m.a. vinnustofur sem Bridget Burger hélt um Verkefnamiðað nám (Project Based Learning), Nýsköpunar- og uppfinningamennt (Invention Education og Innovation Education), Árangursvíddir (Dimensions of Success) út frá PEAR’s líkaninu, en PEARS stendur fyrir Partnerships in Education and Resilience.
Þá áttu Huld og Bridget góð samtöl við kennara á svæðinu, en ein af mikilvægustu aðgerðum STEM Húsavík, sem skilgreindar voru í stefnumótun ráðgefandi stjórnar í maí sl., var tenging við skóla og stuðningur við kennara. Mikilvægt er að heyra frá fyrstu hendi hvaða stuðning kennarar kjósa að fá frá STEM Húsavík til að auðvelda og greiða leið að hágæða STEM kennslu.
Um helgina lauk síðari Fulbright heimsókn Bridgetar Burger, en hún hófst um miðjan október með þátttöku í Arctic Circle ráðstefnunni í Hörpunni. Þar tóku Huld, verkefnastjóri STEM Húsavík og Bridget þátt í vinnustofum um menntun á norðurslóðum, auk þess að beina sjónum sérstaklega að konum og unmennum.
Arctic Circle var haldið dagana 13. – 16. nóvember og voru yfir 2000 þátttakendur í ráðstefnunni í ár og yfir 200 vinnustofur og viðburðir. Rödd frumbyggja á norðurslóðum var sterk og áberandi á ráðstefnunni, ásamt röddum ungmenna, en báðir hópar kölluðu skýrt eftir að vera hafðir með í ákvarðanatökum og stefnumótunum.
Huld og Bridget náðu að eiga samtal og mynda góð tengsl við samfélagsleg net og ungmennahreyfingar í Kanada og Grænlandi og hlakkar til að eiga áframhaldandi samtal og samstarf um STEM menntun á norðurslóðum í komandi framtíð.
STEM Húsavík er fyrsta þverfaglega STEM fræðslunetið á Íslandi með áherslu á samfélagsþátttöku. (STEM vísar til Science, Technology, Engineering and Math).
Samfélagsleg nálgun á STEM fræðslu og kennslu eykur áhuga ungra sem aldinna á umhverfi sínu og opnar fyrir möguleika í grunnmenntun, símenntun og endurmenntun. Slík nálgun getur einnig ýtt undir áhuga á raungreinum strax á unga aldri og eflt vísinda-, umhverfis- og haflæsi allra þátttakenda, auk þess að hvetja til nýskapandi nálgana á aðsteðjandi og raunverulegum vandamálum.
STEM Húsavík var formlega sett á laggirnar í lok maí 2022 af verkefnastjóra, ráðgjafa og ráðgefandi stjórn STEM Húsavík. Þá var unnin markmiðsyfirlýsing, innviðakortlagning og SVÓT greining, auk stefnumótunarvinnu STEM Húsavík fyrsta árið. Í ráðgefandi stjórn sitja aðilar frá eftirfarandi stofnunum: Þekkingarneti Þingeyinga/FabLab Húsavík, Hvalasafninu á Húsavík, Náttúrustofu Norðausturlands, PCC Bakka Silicon, Ocean Missions, Rannsóknasetri Háskóla Íslands á Húsavík, Framhaldsskólanum á Húsavík, auk óstofnaðra samtaka um verndun í og við Skjálfanda. Til stendur að setja á fót skólaráð STEM Húsavík með aðkomu allra skólastiga.
Eftir því sem umhverfisaðstæður breytast er hefðbundnum lífsháttum og framfræslu ógnað, ekki síst í smærri byggðarlögum landsins. Hraðar tækniframfarir kalla á nýja hæfni og samfélög verða að aðlagast og þróa færni sína, viðhorf og seiglu gagnvart þessum breytingum. Það sama á við um hæfni til að vinna þvert á ólík svið, leita nýrra lausna, gagnrýna og taka virkan þátt í lýðræðislegri umræðu.
Hlutverk STEM Húsavík er að þjóna sem samfélagslegt vistkerfi og samanstendur af ólíkum aðilum innan samfélagsins: Skólum og fræðslustofnunum, rannsakendum og atvinnulífi, iðnaði, félagasamtökum, menningarstofnunum, söfnum, bókasöfnum, listafólki, fjölskyldum og einstaklingum. Fræðslunetið er opið öllum sem áhuga hafa.
Fræðslunetið mun nota alþjóðlegt, vel þekkt og áhrifaríkt líkan STEM Learning Ecosystems til að bjóða bestu starfsvenjur þegar kemur að hagnýtri fræðslu og kennslu. Sérfræðiþekking Bridgetar Burger er mikilvægur hlekkur í því ferli, sem hefur gert það að verkum að hægt er að nýta reynslu frá fyrstu hendi við innleiðingu og uppbyggingu fræðslunetsins.
