Þann 17. apríl sl. samþykkti stýrihópur Norðurslóðaáætlunarinnar (Northern Periphery and Arctic Programme) 6 verkefni úr verkefnakalli tvö .

Um er að ræða 5 aðalverkefni í forgangsröðun 1 og 2 og eitt svokallað “smáskala” verkefni, sem er jafnframt fyrsta verkefni nýs flokks, sem kallast forgangur 3 og snýst um að styrkja samstarfsmöguleika á Norðurslóðum. Það er verkefnið Arctic STEM Communities sem STEM Húsavík leiðir, en það er fyrsta verkefni sem samþykkt hefur verið frá upphafi í forgangsröðun 3. Slík “smáskala” verkefni nýtast jafnframt sem undirbúningsverkefni stærri verkefna.

Verkefnið hefst formlega 1. júní og nær yfir 18 mánaða tímabil, en nú á dögunum fór Huld á upphafsfund Norðarslóðuaáætlunarinnar þar sem forsvarsfólk allra 6 verkefnanna kom saman í Kaupmannahöfn.

Arctic STEM Communities snýst um að efla samfélög á Norðurslóðum og byggja upp færni til framtíðar með STEM Learning Ecosystems líkaninu, og byggja þannig upp þversamfélagsleg námsvistkerfi í kringum hágæða STEM menntun.

Dagana 1. – 3. maí fór fram árleg ráðstefna STEM Learning Ecosystems starfssamfélagsins (SLE Community of Practice) sem haldin er af TIES (Teaching Institute for Excellence in STEM) í Flórída í Bandaríkjunum. Starfssamfélagið samanstendur af 111 námsvistkerfum sem deila reynslu, aðferðum og niðurstöðum sín á milli.
STEM Húsavík var í hópi 9 nýrra námsvistkerfa sem tekin voru formlega inn í starfssamfélagið á ráðstefnunni. 

Flest námsvistkerfin starfa vítt og breytt um Bandaríkin, en þeim hefur undanfarin ár fjölgað jafnt og þétt utan Bandaríkjanna og er nú að finna SLE námsvistkerfi í Kanada, Mexíkó, Kenýu og Ísrael ásamt Íslandi. Námsvistkerfin ná samanlagt til yfir 42 milljóna skólabarna á leik- og grunnskólaaldri og eru yfir 900.000 kennarar og leiðbeinendur hluti af því.

Það er mikill heiður að hafa verið valin til að vera hluti af STEM Learning Ecosystems starfssamfélaginu og vera loksins komin á kortið, að ekki sé tala um að vera fyrst á Norðurlöndunum og N-Evrópu. 

Það eru sannarlega spennandi tímar framundan og við hlökkum til að tengjast, kynnast og læra af hinum 110 námsvistkerfunum sem byggja samfélagið.  
STEM Húsavík verður á næstu vikum tengt við annað námsvistkerfi sem mun gegna leiðsagnarhlutverki (mentor) fyrstu missierin og bíðum við spennt eftir að fá að tengjast inn í þennan litríka og fjölbreytta heim.

Í Hádegishittingi marsmánaðar sagði Martin Varga frá verkefni sína um fýsileika þess að framleiða lífrænan áburð úr úrgangi sem annars er hent. Martin hlaut nýverið styrk úr Uppbyggingarsjóði Norðurlands eystra til þess að skoða möguleikana hér á svæðinu, en erlendis þekkist þessi aðferð og er vel nýtt.

Fjölmargir þættir ýta undir fýsileika þess að notast við lífrænan áburð framleiddan á Íslandi í stað tilbúins/framleidds áburðar, svosem flutningskostnaður nú í kjölfar covid, sem og stríðsins í Úkraínu – en ekki síður en háværar kröfur út frá náttúruverndar- og heilsufarssjónarmiðum, en notkun á tilbúnum áburði hefur neikvæð áhrif til langs tíma á jarðveg, grunnvatn og sjó.
Þá eykst eftirspurn eftir lífrænum matvælum með hverju árinu.

Hér er Martin með sýnishorn af áburði úr kinda-ull, kindahornum, þara og hestaskít.

Ein af aðgerðum STEM Húsavík fyrsta árið til að auka vitneskju um STEM í samfélaginu, er að setja í loftið hlaðvarpsþætti um STEM í samfélaginu.

Það er því ánægjulegt að tilkynna um fyrsta þátt STEM Spjallsins, sem nú er kominn í loftið á hlaðvarpsveitunni Podbean.

Í þáttunum fær Huld Hafliðadóttir, forstöðukona STEM Húsavík, til sín gesti sem á einhvern hátt tengjast STEM (vísindi, tækni, verkfræði, stærðfræði) í samfélaginu, hvort heldur sem er í gegnum nám og kennslu, störf og rannsóknir eða á annan hátt. 

Mikilvægi tölvu- og tæknimenntar – STEM Spjallið

Sigurður Narfi Rúnarsson, kennari við Framhaldsskólann á Húsavík, er nýjasti gestur STEM spjallsins. Hann skrifaði M.ed. ritgerð sína um mikilvægi tölvu- og tæknimenntar fyrir framtíðina. Í STEM spjallinu ræðum við um STEM kennslu, Arduino og annars konar forritun og mikilvægi þess að fá að fikta og prófa sig áfram.

1. Mikilvægi tölvu- og tæknimenntar 26:49
2. Hvað gerir hugbúnaðarsérfræðingur? 25:08

Ef þú hefur ábendingar um áhugaverðan viðmælanda fyrir STEM Spjallið, ekki hika við að hafa samband: stem@stemhusavik.is

Þessi hlaðvarpsþáttaröð er styrkt af Samfélagssjóði Landsvirkjunar.

Árið byrjaði farsællega hjá STEM Húsavík, en fyrsta vinnustofa fyrir kennara var haldin 2. janúar. Það voru rúmlega 40 kennarar og annað starfsfólk frá leikskólanum Grænuvöllum sem nýttu hluta úr starfsdegi sínum til að læra um STEAM fyrir leikskóla. 

Um vinnustofuna sáu Huld Hafliðadóttir og Bridget Burger, en starfsfólk kom í fjórum hópum og stóð hver vinnustofa yfir í um klukkustund. 
Á vinnustofunni voru kynnt ný STEM tæki og leikir fyrir starfsfólk, en tækin verða aðgengileg til útláns í tækjasafni STEM Húsavík. STEM tækin eru hluti af styrkveitingu Bandaríska sendiráðsins, en STEM Húsavík hlaut styrk frá Bandaríska sendiráðinu nú í vetur. Með styrkveitingunni gefst STEM Húsavík kleift að bjóða upp á vinnustofur fyrir kennara í kringum tæki í tækjasafni, sem og að kaupa og eiga STEM tæki sem styðja við kennslu STEM greina.
Markmið vinnustofunnar var að gefa yfirsýn yfir STEAM og hvernig það lítur út í kennsluumhverfi barna á fyrstu skólastigunum, eða fyrir 1-6 ára börn og kynna STEAM orðaforða sem fellur vel að kennsluumhverfi ungra barna.

Þá var markmiðið einnig að efla og hvetja kennara til að bæði kenna STEAM sem og að nýta sér sem og innleiða orðaforða STEAM við kennslu. Þá undirstrikuðu Huld og Bridet að það mikilvæga er að muna að börn eru vísindamenn frá nátturunnar hendi. Þau kynnast heiminum með því að gera tilraunir, snerta, skynja, smakka og nota til þess vísindalega aðferð. Sömu aðferð og vísindafólk notar, neman í einfaldaðri mynd.

Þá endaði hver vinnustofa á heimsókn í FabLab Húsavík þar sem starfsfólk fékk kynningu á starfseminni og hugmyndir að mögulegri nýtingu í leikskólastarfi ræddar.
Stuðningur við kennara var ein af meginaðgerðum STEM Húsavík sem skilgreindar voru í stefnumótun í maí 2022, en bæði Lóa, Nýsköpunarstyrkur fyrir landsbyggðina, sem og styrkurinn frá Bandaríska sendiráðinu styrktu vinnustofur fyrir kennara. Til stendur að bjóða upp á vinnustofur fyrir kennara allra skólastiganna á Húsavík á næstu vikum og mánuðum.