STEM og Nýsköpun í skólastarfi

Starfsemi STEM Húsavík og STEM Íslands var kynnt á fræðslufundi á vegum Alheims, vísindaseturs nú í mars, en þar var Huld með erindi um mikilvægi samfélagslegrar þáttöku í menntun.

Auk Huldar, sem kynnti STEM Húsavík og STEM Ísland, kynnti Eyjólfur Brynjar Eyjólfsson starfsemi Nýmenntar á Menntavísindasviði og Per-Arild Konradsen stofnandi forstjóri FIRST Scandinavia kynnti the Newton concept, sem er hugmyndafræði sem byggir á verklegum og verkefnamiðuðum námsstöðvum (Newton Rooms) þar sem nemendur fá að vinna að raunhæfum og spennandi verkefnum í STEM-greinum (vísindi, tækni, verkfræði og stærðfræði).

Markmið Newton-aðferðarinnar er að:

Vekja áhuga nemenda á STEM-greinum
Tengja nám við raunveruleikann
Styðja við kennara með tilbúnum námspökkum og búnaði
Efla færni nemenda í sköpun, samvinnu og lausnaleit

Kennslan fer fram utan hefðbundins skólastofuumhverfis í svokölluðum Newton herbergjum, sem er sérhannað rými fyrir STEM-nám. Þar vinna nemendur að fyrirfram þróuðum verkefnum sem eru oft byggð á raunverulegum áskorunum úr atvinnulífinu.

Ársfundur ICEBERG í Nantes

STEM Húsavík átti fulltrúa á ársfundi ICEBERG verkefnisins sem haldinn var dagana 4.–6. febrúar 2025 í Nantes í Frakklandi. Huld, sem situr í ráðgefandi stjórn verkefnisins, tók þátt í fundinum sem ráðgjafi og tengiliður við samfélag feltrannsókna. Það er Stofnun Vilhjálms Stefánssonar sem tekur þátt í verkefninu fyrir hönd Íslands.

Fundurinn markaði eitt ár frá upphafi ICEBERG verkefnisins og var dýrmætur vettvangur til að yfirfara helstu árangur, fá endurgjöf frá Evrópusambandinu, miðla upplýsingum og skipuleggja næstu skref verkefnisins.

Auk Huldar í ráðgefandi stjórn verkefnisins situr Erik Kielsen frá Grænlandi, en hann sér um aðstoð og tengingar við samfélagið á Grænlandi. 

Von er á rannsóknarfólki ICEBERG verkefnisins til Húsavíkur í byrjun sumars.

Vel heppnaður fyrsti vinnufundur ViSOE verkefnisins í Stavanger

Fyrsti vinnufundur Erasmus+ verkefnisins ViSOE var nýlega haldinn í Stavanger í Noregi með góðum árangri. ViSOE stendur fyrir Visual Storytelling for Ocean Education og er samstarfsverkefni Háskóla Íslands (Rannsóknaseturs Háskóla Íslands á Húsavík), Háskólans í Stavanger, Háskólans í Árósum og STEM Íslands og stendur yfir í þrjú ár.

ViSOE miðar að því að þróa nýskapandi, stafrænt námsefni um hafið fyrir kennara, m.a. byggt á nýlegri siglingu leiðangursskipsins Barba um norðurslóðir. Markmiðið með námsefninu er að auka þekkingu og vitund um hafið og lífríki þess, auk þess að stuðla að lifandi, skemmtilegu og fjölbreyttu námsefni. Efnið byggir á fjölbreyttum, persónulegum og myndrænum sögum úr leiðangri á norðurslóðum og verður aðgengilegt á netinu, bæði sem námsefni í kennaranámi og sem styttri námskeið fyrir starfandi kennara.

Verkefnið nýtir sér að auki efni frá fyrri hvalaskoðunar- og rannsóknarverkefnum, þar á meðal hljóðupptökur af hvölum sem notaðar verða í námsefninu. STEM Húsavík og STEM Ísland taka þátt í verkefninu m.a. með því að miðla því til kennara á Íslandi og leggja til tæknilega og vísindalega þekkingu. Verkefnið eykur þannig aðgengi að kennsluefni sem tengist náttúru Íslands. Markmiðið er að útfæra efnið á íslensku, dönsku og norsku.

Team Starfish tók þátt í First LEGO League

Um liðna helgi fór fram hin árlega tækni- og forritunarkeppni FIRST LEGO League í Háskólabíói, en keppnin hefur verið haldin af Háskóla Íslands frá árinu 2005, sem hluti af stærri alþjóðlegri keppni. Líkt og í fyrra var Forritunarklúbbur STEM Húsavík í samstarfi við FabLab Húsavík með lið í keppninni, að þessu sinni hið glæsilega lið Team Starfish, en þema ársins í keppninni var e. Submerged – eða neðansjávar.

Tilgangur First Lego League (FLL) er að bjóða ungu fólki að taka þátt í spennandi verkefnum sem:

  • skapa færni í vísindum og tækni
  • örva nýsköpun
  • byggja upp lífsleiknihæfileika eins og sjálfstraust, samvinnu- og samskiptahæfni

Liðið samanstóð af 7 flottum nemendum úr Borgarhólsskóla, en 5 af þeim tókum þátt í keppninni sjálfri. Vegna veðurs komst liðið ekki suður og tók því þátt rafrænt og voru vélmennakapphlaup þeirra tekin upp á föstudeginum og keppnin sjálf var svo á laugadegi.

Team Starfish mætti í tvö viðtöl við dómara, rafrænt á laugardeginum, auk þess að fylgjast með beinu streymi frá keppninni ásamt fjölskyldu og vinum á Stéttinni.

Þá hlaut Team Starfish þriðju verðlaun í flokknum Besta liðsheildin. Við óskum Team Starfish til hamingju með frábæran árangur og flott lið og hlökkum til að sjá þau spreyta sig í tækni og nýsköpun í framtíðinni.

Þrívíddargleraugu til að læra um hvali og plastmengun

Verkefni sem miðar að því að efla umhverfisvitund nemenda og hvetja til umhverfisverndar á viðkvæmum norðurslóðum, auk þess að sýna fram á möguleika sýndarveruleika til menntunar með svokölluðum sýndarhreyfanleika.

©Kristinn Ingvarsson

Arctic Sense er fjögurra mánaða vísinda- og samskiptaleiðangur um Atlantshafið (einkum Svalbarða) sem hófst í júní 2021. 
Það voru Rannsóknasetur Háskóla Íslands á Húsavík undir stjórn Dr. Marianne H. Rasmussen og leiðangurs-seglskipið Barba AS sem leiddu verkefnið. Markmiðið var að rannsaka hvalastofna og kortleggja plastmengun í gegnum ferðina, auk þess að kanna vistkerfi Atlantshafsins, meta núverandi heilsufar þess og spá fyrir um áhrif þróunar norðurslóða.
Tilgangur Arctic Sense var einnig að fræða yngri kynslóðina um hafið, mikilvægi þess og viðkvæmni í tilefni af áratug Sameinuðu þjóðanna um hafvísindi fyrir sjálfbæra þróun (2021-2030).
Að leiðangri loknum voru sjónrænar og vísindalegar afurðir hans notaðar til að setja saman yfirgripsmikinn fræðslupakka fyrir skóla og söfn í Noregi, Danmörku og Íslandi. 

Sýndarveruleiki, með færanlegum höfuðbúnaði, vekur leiðangurinn og uppgötvanir hans til lífsins aftur og aftur. Þannig munu fjölbreytt verkefni byggð á skólanámskrám í náttúrufræði, stærðfræði og sjálfbærni bjóða upp á raunhæfa og hagnýta reynslu tenga lausnamiðun, vettvangsvinnu og gagnagreiningu. Með verkefninu vonast rannsakendur til að bjóða upp á sýndarhreyfanleika í menntun og ávinning af ferðalögum án þess að þurfa að ferðast.
Samstarf skóla og safna í Noregi, Danmörku og Íslandi var grundvöllur verkefnisins en samstarfsaðilanir leiðbeindu við að hanna námsefni, prófa það og veita endurgjöf. 

Afraksturinn var pakki sem ferðaðist til skóla og safna í þessum þremur löndum á verkefnistímabilinu. Nú er verkefninu lokið og gleraugun og námsefnið verður til útláns fyrir menntunaraðila í tækjasafni STEM Húsavík.